e.અસ્મિતા

આ નવોદિત સમાચાર પત્ર – “e.અસ્મિતા” તમને સાદર કરતા અમે આનંદ અનુભવીએ છીએ. તેમાં આગામી નવમી ભાષા-સાહિત્ય પરિષદ બાબતની માહિતીવિગતો પણ મુકાઈ છે. અાવતી જાહેર બૅન્ક હૉલિડેના દિવસો દરમિયાન, શનિવાર, 29 તથા રવિવાર 30 અૉગસ્ટ 2015 વેળા આ પરિષદ વેમ્બલીમાં મળશે.

તમે આ વારતારીખ નોંધજો અને હાજર રહેવાનું વિચારજો. ભોજન વગેરેની સગવડ સારુ યોજકોને સુગમતા થાય તેથી, તમારી હાજરી વિશે અમને આગોતરી જાણ કરવા વિનંતી છે. આ સમાચાર અંગે ય તમને કંઈ કહેવાકરવાનું હોય તો ય અમને લખી જણાવશો.

સસ્નેહ
પંચમ શુક્લ
ગુજરાતી સાહિત્ય અકાદમી

We are happy to forward our very first news letter ‘e-Asmita’. It contains information about our forthcoming events including 9th Lingua-literary Conference. The conference will take place during the Bank Holiday period: 29-30 August 2015 in Wembley.

We would appreciate if you note this date and let us know well in advance your attendance for catering arrangements. We would also like to avail your feedback on this news letter.

With regards,
Pancham Shukla
Gujarati Literary Academy
28 Jun 2015

e.અસ્મિતા:

વિવિધ સ્થળે પથરાયેલા સભ્યો અને સન્મિત્રો સાથે ગુજરાતી સાહિત્ય અકાદમીએ ત્રણ ત્રણ દાયકાઓ સુધી મુદ્રિત પરિપત્રો દ્વારા સંપર્ક જાળવી રાખ્યો છે. બદલાતા જતા માહોલમાં, કેટલીક વહીવટી મુશ્કેલીઓ અને મર્યાદાઓને કારણે, હવે પછી પરિપત્રો મોકલવાનું શક્ય નહીં હોય. છતાં પણ અકાદમી આધુનિક ઈલેક્ટ્રોનિક સંસાધનોના ઉપયોગ વાટે દેશ દેશાવરે પથરાયેલા સભ્યો અને સન્મિત્રો સાથે સંપર્ક ટકાવી રાખવા કૃતનિશ્ચયી છે. જેનાં ભાગરૂપે “e.અસ્મિતા”નો નમૂનાનો (Dummy/ચૂસણી) અંક આ સાથે સાદર છે. પ્રતિભાવ પાઠવશો.

હાલના ઠરાવ મુજબ, “e.અસ્મિતા” ત્રૈમાસિક હશે અને અકાદમીના મુખપત્રની ગરજ સારશે. “e.અસ્મિતા”ના સંપાદનની જવાબદારી પંચમ શુક્લ સંભાળશે. જ્યારે સહયોગીઓ તરીકે વિપુલભાઈ કલ્યાણી, ભદ્રાબહેન વડગામા, અનિલભાઈ વ્યાસ, ફારૂકભાઈ ઘાંચી અને નીરજભાઈ શાહ રહેશે.